塔斯曼尼亞之旅回想篇 主要我安心結束熱愛的工作去感受一下澳洲之大，我相信一定有佢o既含意，而且一定會令我的人生更豐盛的！Tasmania，我黎啦~~ (日期：2009年5月9日 – 2009年5月17日)
由於昨天工作到晚上十一時，而且又要從小D家中趕搭尾班火車到Deep V家中借宿一宵，今早凌晨五時多起床真的確實非常痛苦，但知道是旅遊玩樂，開心抗奮o既心情將所有問題都抵消晒！ 6時多到達domestic airport，今次係我o黎到澳洲咁耐第一次坐飛機，仲要係內陸機。由於我在悉尼逗留了太長的時間，我已不知不覺將這個地方變o左做自己o既家，今次離開Sydney坐飛 機，我覺得好似自己以前o係香港去旅行咁，而且坐飛機俾我o既感覺更加似遠行，所以我真的超期待這個旅程呀！ 兩小時多的機程，我和大S終於到達Tasmania的Hobart機場會合由Melbourne來的舒敏，有多位熟朋友加入，行程一定更加happy！到達後第一時間到機場旁邊的租車公司(手羅)車，o黎梗呢9日我就會充當司機，暢遊Tasmania一周！
Day 1：行程的第一站，我們去了Hobart的Salamanca Market，這個市集只會在每週的星期六營業一天，剛巧這天是星期六，我們當然要去逛逛啦！這裡主要都係賣一些手工藝品和飾物 ，另外也有賣蔬菜水果鮮花o既檔攤，我梗係唔會錯過Tasmania最出名o既蘋果啦~~我們還在這裡享受了一個滿港式風味o既掃街 午膳！正~~ 數小時的車程後，我們到達Eason特輯的一個景點，Kate's Berry Farm！我地黎呢個農場o既目的主要係黎食草莓，可惜黎到草莓已沽清，但慶幸我地仍能品嚐鮮製美味的草莓雪榚和購買農 場自製o既果醬！ 由於澳洲正值深秋(日短夜長)，加上前幾日工作和頻撲，所以今晚我們盡早投棧！Freycinet National Park便是我們的落腳地，我們還在hostel自製晚膳呢！ P.S. 我帶黎harddisk經小D接手就壞了，但我知與他無關的，只怪我自己唔好彩，希望返HK可以整得返啦！我D相全部o係晒入面，有小部份無copy，有咩問題就損失慘重啦！心情指數直插谷底！ Sixxx後記：話說有一日o係Perth，我幫Sammui開電腦o既時候boot唔起個Windows，Sammui想怪罪於我，話我整壞佢部notebook，好彩經過reset之後，最後都boot得起個Windows。在此奉勸各位唔好掂Sammui o既物品，好人冇好報。
Day 2：清晨7點半，我地就出發去Freycinet National Park的Lookout欣賞酒杯灣(Wineglass Bay)，但由於今早密雲，所以不能夠影射出這海灣醉人o既景色，不過能夠在這國公園走走，呼吸一下大自然清新 o既 空氣都已經是件樂事。個多小的車程，來到Ross這個地方原因只有一個，就是了參觀以<<魔女宅急便>>為故事背景的麵包店(Ross Bakery Inn)，這也是團友舒敏想來的景點之一！當然我地唔會到此一遊這麼簡單，這裡的pie & tart也很不錯呢！在這裡吃過漢堡飽，fish & chips做午膳後，我們便開車到下一個景點 – Blow Hole欣賞這個由海浪洶湧衝激造成的十尺巨浪花，而且裡還有一塊花崗岩巨石！ St Helens有個即開即食的生蠔場，愛蠔者大S和舒敏本來打算在這裡大飽口福，可惜我地到達o既時候已經關門大吉了，其實我地到達的時間都只不過係下午四點多，但澳洲就係一個咁o既 地方 – “唔休做"！失望o既我地唯有趕快車程去Tasmania第2大城市(Launceston)。經過不斷在市區兜轉，終於讓我搵到一間想o食既泰國餐廳，我地盡情豪食(因為o係塔省好難找到asian food)。滿載而歸的我們便回到我們這夜落腳點 – Caravan。
Day 3：在Launceston市中心食過一個西式早餐後，我地便到Tasmania Chairlifts乘坐全球最長的單軌吊車(457米)，這裡有一流o既景色，在Alexandra吊穚下還可欣賞壯觀的瀑布奔流景色。在市中心參觀完啤酒廠和午膳後，我地就開車到Cheese Factory和Honey Farm參觀與購物，因芝士需要冷藏，所以不便購買，但我卻買了不少蜜糖，也品嚐了那裡獨有的Honey Ice-cream！趕往達文港(Devonport)留宿，可惜租金卻非常昂貴，平o既hostel又full晒，我地食過Noodle晚膳後，決定黎一次人生的大體驗 – "訓車"！我將名貴五人房車停泊在Devonport 24小時開放的McDonald's旁，便開始我們漫長的"車箱大覺訓"行動，由於入夜後氣溫驟降，又沒有被舖，這種冰凍o既滋味真係點滴在心頭！
Day 4：終於等待到天光o既o黎臨，昨晚o既"訓車"經歷真係令我o地畢生難忘，車箱又細大窄，仲要加上勁凍o既天氣，真係徹夜難眠。食返一個豐富o既麥噹噹早餐後，我們繼續今天的行程。第一站Don River Railway(老式火車)，由於我o地太早到達，這個火車之旅只有我o地3位乘客，可以包起架老式火車都算好運，不過車長對我o地講解有關老式火車o既歷史和旅程時，我o地就唔知俾咩反應佢！(哈~哈~因為聽唔明)企鵝係一個簡樸o既城市，呢個小城市到處都會發現企鵝o既?蹟，就連一個垃圾箱都有企鵝o既圖像！玩o既時間又o黎啦~~ Tasmaze(迷宮)係一個大人細路都o岩玩o既地方。我咁大個仔第一次一個真真正正連大人都會走不去o既迷宮陣，這個地方規模非常之大，而且環境優美，整個迷宮陣都係由這裡o既值物整成。我們在這裡玩得亦樂乎，這裡還有很多不同國家的屋仔和薰衣草田！入夜前我o地終於到達今晚落腳地 -- Cardle Mountain(搖籃山)，這裡的氣溫比市區還要凍，不過也沒有影響我o地o係Tasmania唯一的一個夜間活動 -- 夜訪搖籃山。整個探險行程長達一小時，我o地坐o係一架吉普車裡，探訪這裡的野生動物。雖然下著毛毛細雨，但在經驗豐富的導遊帶領下，不難找到很多可愛o既野生動物，這也總算值回票價。食過簡單的晚膳後，今晚我o地便在搖籃山留宿一晚！
Day 5：昨晚o既雨延續到今早o既清晨，令搖籃山o既氣溫凍上加凍，更添幾分寒意！我地將 去搖籃山野鴿湖(Dove Lake)的行程順延一小時，可惜天氣卻沒有改善，雨水加上霧氣，令這個Dove Lake加上一份神秘而矇矓o既淒美。離開搖籃山，我地便向鐘乳石洞出發，好景不常，我地竟然在山路上演一場迷路記，由於GPS的出錯，令我地走進一條崎嶇不平的石泥路。膽小的Mi o個一刻真係幾驚，油又差唔多耗盡，而且條路全部都係石仔，我又膽心會爆呔，都唔知幾時先可以離開這段完全沒有路標指示和汽車行過o既單程路，心裡不斷禱告，求主保守我地，最終我決定掉頭回去，離開這條我們花了差不多一小時的迷宮陣。排除萬難，我地終於到達目的地，我地先到油站入油，順便洗車，(因為經過幾日o既行程和剛才那條石泥路，今次非洗不可)，之後到鎮上的一間小酒店食西式漢堡，這裡的東西確實不錯。我們準時參加3點鐘的團，整團人只有我地3個，導遊用純英語介紹洞內的蜘蛛和鐘孔石洞，我們只能作出有限的回應，場面極度尷尬，不過洞內真的非常美麗，那些錐型o既鐘孔石加上洞內o既燈光，造成閃閃發光的效果。最後我們還在洞內欣賞了無數的螢火蟲，他們就如天空上的星星這 那樣迷人。參加完旅程後，我以極速2小時30分開車回Hobart，原因是為了明早迎接小D的來臨。在市中心食過越南菜後，我們便回hostel休息，期待著多一位朋友o既加入。 Day 6：一早起身後，我地便到機場接小D。終於見到佢了，但卻上演了一場爆笑的情景，而且還令舒敏小姐笑到喊添！劇情係講述當我地見到佢o既時候發現佢o既行李箱超大，比我地3個任何一個都要大，但其實最重要佢只係黎呢度3日，我地都唔知佢拎咁大個行李做乜，裡面仲要話俾我地知冇乜放野 。由於我地只係租左架5人車，本來放我地3個o既行李已經只係剛剛好，但再加上小D和佢o既超級大型行李箱後，坐後座o既舒敏和小D就真係擠擁到不得了，坐o係車頭的我和大S除了笑都唔知可以做咩！Anyway，行程依然要繼續，第一站食蠔記，我地o係機場附近的生蠔養殖場買左2打生蠔，由於外賣比堂食便很多，所以我地唯有外賣在車箱進膳！生蠔真係非常鮮味，但我o既肚仔一早唔可以食咁多生冷野，所以只係食左3隻，其餘奉獻埋比大S，因為我知佢鐘意食，再者佢話呢度d蠔好好味！滿足完愛蠔者之後，當然要為我呢位司機填飽肚才出發，於是我地到市中心o既越南餐館食飯，再去我地下一目的地 – 吉百利朱古力廠，入場費每人$7.5，行程包括聽佢地講解朱古力o既製造過程和試食唔同o既朱古力！而我地亦o係度買左d朱古力離開~~趕往侯恩河附近的air walk，可惜由於侯恩河水位高漲，今天air walk沒有開放，於是我們便到侯恩河坐噴射船(Huon Jet)，呢個環節係Eason o既特輯都有做過，我地當然唔會錯過啦！雖然30分鐘要成$65澳元，但在寬闊的侯恩河上高速飛馳，真是剌激無比！玩完Huon Jet，我地順便報名參加明天的Bruny Island一日遊後就回Hobart。返到hostel，我地休息一會後就出發去買野準備明天o既早·午膳，之後再到Hobart海港食一餐豐富o既海鮮餐做dinner！ Day 7：食過小D煮o既豐富早餐後，我便開車到Bruny Island，而我地要乘坐汽車渡輪才能到達該島！到達後我還要開一小時車程 才能到達目的地！我們準時到達集合地點，負責人給我一個非常熟悉o既感覺，憑我o既記性，我認得佢係o係Eason特輯出現過的負責人，當我地自我介時，他真的問我地有無睇過Eason o既特輯，原來我地參加呢個海上3小時探險之旅 ，同Eason o個個係一樣嫁，我諗我地可以將電視機睇到o既畫面親眼呈現o係我地眼前。11點旅 程正式開始，由於下著微雨，所以令到天氣更加寒冷，我地做好準備正式向Bruny Island環島遊！我地呢個3小時歷程非常豐富，包括有睇企鵝，海蝕洞，海蝕拱，噴水洞，滕圖柱，海獅......雖然這個海上之旅真係又濕又凍，但能夠這麼真實和近距離去接觸呢個大自真係非常值得 ，我覺得大家有興趣也要到這裡走一趟，板主誠意推介Bruny Island俾大家！完成呢個旅程 後 ，我地便回hostel休息，因為大家都累透了！晚上我地4人決定去一間高級餐廳吃一餐貴價菜！這間餐廳位於Hobart港口，設計以海盜為主，裡面有不少海盜船和寶藏作背景，身處 o係裡面就尤如化身了海盜一樣。我地點左好多新鮮o既海鮮，而且還叫了兩杯紅/白酒，邊飲邊食，樂趣無窮 。 Day 8：死心不息的我決定再去多次air walk，睇下有無開放，結果皇天不負大心人，終於比我等到。我地冒雨走進這條離地60米高的air walk之上欣賞茂密o既叢林，最後我們還能高處欣賞這條壯麗無比o既侯恩河添。極速趕回只有星期六才開放的Salamanca Market，因為小D尚未逛過，而我地3個鎖定要買 o既手信和食物，爭取有限的時間出發去下一個景點 – Port Arthur！呢度以前係一所監獄，亦係Eason到訪過o既地方，我地可以知道以前o既監犯在這裡o既生活模式，而家對遊客來說是一個風景優美，富有參觀價值o既地方，但相信在以前，我諗無人會想踏足此地！回歸 hostel後亦係我地晚膳o既時間，我地特意幫襯hostel裡面o既 pizza店，原因佢地係用原始o既爐焗來做pizza，感覺很有風味。 Day 9：行程的最後一天，我地把握時間去睇只係離我地15分鐘車程o既Richmond古老大橋，由於我地真係太早到達，天都未光，所以我地先搵定小D想食o個間bakery再回Richmond。再回大橋時間剛剛日出，而且還有一群鴨仔歡迎我地添。我地把握時間拍照和欣賞清晨o既第一線光後就開車到bakery食Tasmania最後一餐豐富o既早膳！我地品嚐了唔同o既酥餅(puff)和即磨咖啡，而且還在這裡拍了每人對這個旅程的感受短片添！8點30分準時送小D到Hobart機場，這亦是我地分開o既時刻，雖然有d唔捨得，但我知道6月會再聚的！回到hostel到我地3個執拾行裝，然後再開車往Hobart機場一趟，交還車之後，我們便check in準備乘坐Tiger Airways到阿德萊德，展開我下一個旅程！ 感想一則：其實要駕足9日真係幾疲累，但能夠發揮我少少o既長處同大家暢遊塔省都算值得！感謝各位團友對我o既信任，將大家o既生命財產都交托在我手，多謝大S編排了這9日豐富的塔省之旅，唔係佢o既悉心安排，我地唔會有咁美滿o既行程，佢o既辛勞真係功不可沒。 多謝舒敏對我地o既細心照料，有佢o係身邊打點一切，我地安心得多。多謝小D百忙之中都抽時間和我地一齊暢遊，亦為我地解決左好多和外國人溝通上o既問題。最後感謝主保守我地整個行程能夠順利和安全完成。雖然只係短短o既9日之旅，但這個人物組合和行程對我來說卻是完美的。Tsmania讓我親身感受和體驗了大自然最美o既一面！ | 